Mizoramah drug zuar 340 vel an awm ; Drug addict 2,600 chuang an awm

Central YMA chuan YMA kumpuan hman mek, 'Ram leh hnam humhalh' tih hnuaia hmalakna tur pakhat, ruihhlo do chungchangah nimin khan CYMA Committee Room-ah inràwnkhawmna an buatsaih. Mizoramah ruihhlo ngai (drug addict) mi 2,600 chuang hret an awm thu leh ruihhlo (drug) zuar mi 340 vel an awm thu tarlan a ni.

Inràwnkhawmna hi CYMA president R Lal­ngheta'n a kaihruai a, MJA office bearer te, Mizoram Kohhran Hruaitute Committee (MKHC), MHIP, MUP, MSU, Mizo­ram Bar Association, Police, Excise & Narcotics leh judicial magis­trate aiawhte an tel. Ruihhlo chungchanga thawhhona ṭha a awm theihna atana hmalakho dan tur te, ruihhlo laka ṭhalaite ven dan turte leh thil pawimawh dangte sawiho a ni.

Sawihonaa tarlan danin, Mizoramah ruihhlo (drug addict) ngai mi 2,600 chuang hret an awm a, ruihhlo tih tam ber chu heroin no. 4 a ni. Ruihhlo zuar mi 340 vel awmin, chu'ngte chu ruihhlo ti ve ṭhin tho te, ruihhlo ti loa hlâwkna duha zuar ve hrim hrimte an ni a; Aizawl leh a bul hnai - Phunchawng, Rangvamual, Tuikhurhlu leh a chhehvelah zu zuar mi 343 an awm bawk.

Mizoramah, a bikin Aizawlah ruihhlo ti nasa taka an pun leh tawh avangin fimkhur zawka YMA-in ruihhlo a do leh tak tak a ngai tawh nia an hriat thu te, Myanmar tualchhung buaina avanga sahimna zawnga Mizorama rawn lûtte zingah Phunchawng leh Rangvamual vela zu siamnaa thawk an tam thu leh rakzu an siam chhuah zat pawh a lêt hnih/thum vela a pun thute an sawi.

Ruihhlo do tur leh ruihhlo la ti ve lote ruihhlo laka venghim turin sorkar, kohhran, tlawmngai pawl hrang hrang leh media-te an thawhho ṭhat a ṭul thu te, kohhran inkhawmah ruihhlo ṭhat lohzia inzirtir (awareness campaign) a ṭul thu te, zirna-in, a bikin higher secondary leh a chung lamah inzirtir tam a ṭul thu te, inzirtirna atan mainstream media leh social media-te ṭangkai lehzuala hman a ṭangkai tur thute sawi a ni.

Sorkarin tih tak taka ruihhlo a do a ṭul thu te, ruihhlo dona lama thawktu Excise & Narcotics leh Police-te thuam chak a ṭul thu leh a bikin Excise & Narcotics department (END) tihlen a, sum leh paiah vulh nasat a ṭul lehzual thu te, END-ah enforcement staff mi 400 vel an awm a, chu'ng zinga a zatve dáwn chu hmeichhia an nih thu te, ruihhlo ti mekte chhanchhuahna hmun (counselling leh rehabilitation) tam zawk neih a ṭul thu te, jail-te thuam ṭhat a ṭul thute leh metham­phetamine vanga buaina leh harsat­na tâwk Mizo zingah an la awm loa a lan thute tarlan a ni bawk.

Ruihhloa Mizoram dinhmun
Ruihhlo ngai - 2,600
chuang
Ruihhlo zuar - 340 vel
Aizawl chhehvela zu zuar - 343