Zirlaite kea kal uar turin chah

Higher & Technical Education minister Dr R Lalthangliana chuan, Aizawl khawpuiah traffic jam a nasat ṭhin avangin college zirlaite'n lirtheia kal aiin kea kal uar se a duh thu a sawi.

Dr R Lalthangliana hian nimin khan Hnahthial Electric Veng GSA Hall-ah MVA Inter District Volleyball Championship 2022 vawi 18-na a hawng a; Aizawl khawpuia traffic jam karah college zirlaite'n kea kal uar se a duh thu sawiin "Ke a kal hi a zahthlak lo a, kan taksa sâwizawi ṭhat hi keimahni tan a ni. Kan dam rei leh rei loh hi kan insûmnaah leh kan insâwizawinaahte a innghat," a ti.

Minister R Lalthangliana chuan, infiamnaa thiamna leh hmingṭhatnate'n a daih rei a pawimawh thu leh insûm theih loh vanga mual liam an awm ṭhin chu pawi a tih thu a sawi bawk.

Volleyball hmanga inelnaah hian Siaha district tih loh district dang zawng aṭangin mipa team 10 leh hmeichhia team pakua an tel a, April 9, 2022 thleng neih a ni ang.