END mi pahnih hriatrengna lungphun hawng

Excise & Narcotics minister Dr K Beichhua chuan April 4, Thawhṭanni khan Noaotla khaw dáia kum 1990-a misual kut tuara END mi leh sa pahnih thite hriatrengna lungphun leh Chhaolo-II khua aṭanga Beino lui panna economic link road a hawng.

October 9, 1990 khan END sub-inspector Lalchungnunga leh constable Hmangaihzuala te chuan ruihhlo (opium) tawlh rû ṭhinte man tumin Noaotla khaw dáiah inhmu turin an inrem a, an inbiakna kal sualah ruihhlo tawlh rutute chuan chemtein an vit hlum a, misualte chu an tlanbo a ni.

Lungphun hawnna inkhawmah Dr K Beichhua chuan, "Mihringte hi thih dan hrang hranga la thi vek tur kan ni a, heng zingah hian ram leh hnam tana thihna tluka ropui a awm lo. He thihna tuartute hian ruihhlo do kawngah Zoram mipui hi kan hmabak lo chhunzawm ve tawh rawh u, tiin, he lai hmun aṭang hian min au a ni," a ti a; END a awm chhung chuan an theihnghilh tawh dawn lo tih a sawi.

Chaolo-II - Beino economic link road hi BADP 2019-20 sum nuai 50 hmangin laih a ni a, khawtlangin NREGS aṭanga bul an lo ṭan tawh chhunzawmna niin, km. 5 chuang hreta thui a ni.

Dr K Beichhua chuan, Beino lui chu Siaha district mipui tan Nile lui ang a nih thu sawiin, "Ei leh bara intodelhna atana lui ṭangkai tak a ni a, Chhaolo khaw mipui leh loneitute'n ṭangkai taka an hman ngei ka beisei," a ti.