Champhai DC leh MJA an inkâwm

Champhai district bawrhsap thar James Lalrinchhana chuan nimin khan DC conference hall-ah MJA, Champhai district member-te a kâwm a, district hmasawnna tura hmalakna leh hmachhawpte an sawiho.

James Lalrinchhana chuan, Champhai district nihphung hre chiang leh tawnhriat ngah tawhte finchhuah leh ṭawiawmna a mamawh dawn tih sawiin, "District hmél lanna leh hmalaknate a ṭul ang zela pho chhuaktu media-te'n district inrêlbàwlna leh mipui zirtir kawngah mawhphurhna lian tak an nei a, editorial ṭha tak tak leh zirbingna hmanga chanchin thar mipui hnenah an thlen ṭhin hian mipui sûkthlêk thui takin a her danglam thei a ni," a ti.

Mipui rilru sûkthlêk siam dik kawngah theihtawp chhuah a ṭul thu sawiin Bawrhsap chuan, "Rilru, taksa leh thlarau siam dikna lam hawi zawnga district siamṭhat hi tihmâkmawh a ni a, fûke kima hmasawnna a awm chauhin hmasawnna ngêlnghet leh tluantling a awm thei," a ti a, theihtawp chhuahpui turin MJA member-te a sáwm a ni.

Champhaia IPRO Dr Lallawmkima chuan, Champhai district-a media-te chanchin tlangpui leh hnathawh hrang hrang a tarlang a; chanchinbumite'n ṭha taka sorkar an ṭawiawm ṭhin thu leh thawhhona ṭha tak an neih thu a sawi.

Champhai MJA vice president Lalhlupuia pawhin thu sawiin, MJA chuan mipuite kawng dika kaihhruai leh sorkar khalh ngil leh finchhuah kawngah theihtawp a chhuah ṭhin thu a sawi a; Bawrhsap thar lakah district mipuiin beiseina sang tak an neih thu te, Champhai district tihhmasawn leh tihchangtlun kawngah theihtawp chhuaha ṭawiawm an tum thute a sawi bawk.

MJA, Champhai district-ah hian member 14 an awm mek a; an zinga mi 11 chu Champhaiah awmin, pathum chu Khawzawlah an awm a, ni tin chanchinbu chhuak panga leh local cable TV pahnih a awm a ni.