May 5, 2022-ah MADC inthlanpui

Mizoram State Election Commission (SEC) chuan nimin khan Mara Autonomous District Council (MADC) inthlan hun tur a puang a, May 5, 2022-ah vote thlak a ni ang. MADC sorkar ding lai hun chu May 15, 2022-ah a tàwp dawn a ni.

MADC-ah hian member of district council (MDC) constituency 25 awmin, polling stations 81 leh polling booth 81 a awm a; voter hmeichhia 21,960 leh mipa 20,366, an vaiin voter 42,326 an awm.

MADC MDC inthlanpuia hman tur electoral roll chu kumin March 1-29 chhung khan ennawn a ni a; draft roll-a voter zat mi 43,012 aiin final roll-a voter zat 42,326 chu 686-in a tlem zawk.

Voter tamna ber Siaha East-II bialah voter 2,808 an awm a, voter tlemna ber Amohtlah bialah voter 1,049 an awm a ni. Polling station-ah Amotlah biala Riasikah PS chu voter tlemna ber niin, voter 95 an awm a; voter tamna ber polling station chu Siaha North-I biala College Vaih-I niin voter 1,055 an awm a ni.

MADC inthlanpuiah hian vote thlakna atan electronic voting machine hman a ni dawn a; inthlan puan a nih tak avangin MADC huam chhungah Model Code of Conduct hman nghal a ni.

MADC INTHLAN DAN TUR
Notification chhuah - April 5, 2022
Election notice chhuah - April 6, 2022
Nomination file hun hnuhnung - April 13, 2022
Nomination endik hun - April 13, 2022, 3:00pm
Inhnuhdawh hun hunhnung - April 18, 2022
Vote thlak ni - May 5, 2022 (7:00am - 5:00pm)
Vote thlak ṭhat - May 6, 2022
Vote chhiar ni - May 9, 2022