MNF-in dodalna karah Pathian rinchhanin hlawhtlinna nasa zawk kan chang ang - MNF President

MNF president Zo­ramthanga chuan, kum 2023-a inthlanpui awm leh turah MNF party-in sorkarna an siam leh dawn thu a sawi a, dona leh nekchepna karah Pathian rinchhan chunga an hlawhtlin zel tur thu a sawi.

MNF President chuan nimin khan Serlui North Block MNF-in Vairengtea inkhawmpui a hmanpuinaah thu sawi­in, varparh arsi a êng zual zel dawn tih a sawi a, "Inthlanpui kan hma­chhawn leh turah pawh tun aia tam zawk hruaitu neiin MNF hi a sorkar leh ang. Dona chi hrang hrang leh nêkchêpna hrang hrang karah min hruai tlattu kan Pathian min hruaina hi kan rinchhan tlat a, nun nel tak nei a, amah kan en tlat chuan hlawhtlinna nasa zawk kan chang zel dawn," a ti.

SEDP hmangin bial tinah a tlem berah chhung­kaw 1,500-in Rs 50,000 ṭheuh an dawng dawn tih sawiin Zoram­thanga chuan, "Nakkum­ah ZPM emaw Congress emaw an sorkar loh chuan cheng nuai nga emaw, a aia tam emaw pawh chawi turin opposi­tion-te hi dahkham ngam an awmin a rinawm loh," a ti a, party dang sorkar tura sawi thâwmin mi nuih a tihzat fo thu a sawi.

MNF President chuan, hripui léng leh ramri buai karah buhfai leh gas-ah harsatna awm loin tun hun an thleng thei tih sawiin, "Kawngpui pawh hun hmasaa chhe em em vek kha a ṭha deuh vek ta mai. Kum 60 chhung min hruaitu kan Pathian hian hun harsaah pawh he ram hruai tur hian min dah a ni. MNF hi sorkar lo hlauh ta ila, tun dinhmunah hian kan ram hi a ngaihtuahawm ngawtin a rinawm," a ti.

Inkhawmah hian MNF adviser K Lalrinliana, minister leh Serlui bialtu MLA Lalrinsanga Ralte te pawhin thu an sawi. MNF thuchhuah tarlan danin, MNF President hian Phaisen, Phainuam, Saihapui leh Vairengte North leh South aṭangin an party-ah mi 598 a lâwm lut a ni.