Tuialhthei lâk theih zat bithliah

Food, Civil Supplies & Consumer Affairs (FCSCA) director Ramdinliani chuan thuchhuah siamin, Mizoram IOCL Transporters Forum leh IOCL inkarah tuialhthei phurh manah inhriatthiam lohna a awm avangin April 1, 2022 aṭangin Mizoramah tuialhthei lut a khaihlak thu a tarlang.

FCSCA Director chuan, "Sorkar leh mipuite'n harsatna lian zawk kan tawh loh nan leh petrol leh diesel mamawhtute'n rualkhai zawka chan a nih theih nan khuahkhirhna siam a ni," a ti.

Buhfai/essential commodity phur truck-te hnenah an challan milin an kal lam leh haw lam daih tur tuialhthei pek tur a ni a; lirthei dang zangah chuan ṭum khata lak theih zat tur bithliah a ni. Petrol litre 5,000 leh diesel litre 7,000 aia a tlem chuan filling station neitute'n FCSCA department phalna loa an hralh phal a ni lo.