KHAWTHLIR

Thisen pe
PYD (Mizoram), Kolasib Venglai leh Diakkawn bialte chuan nimin khan Kolasib District Hospital-ah thisen unit 34 an pe a, petute mipa 20 leh hmeichhia 14 an ni a, Venglai bial aṭangin mi 20 leh Diakkawn bial aṭangin mi 14 an ni.

Mamit College-in Grade B+ hmu
Mamit College chu tun hnai khan National Assessment and Accreditation Council (NAAC) Peer Team-ten an endik a, NAAC 2nd Cycle-ah B+ grade (CGPA 2.72) an pe. Mamit College hi a hmain grade B (CGPA 2.08) a ni.

Meth man
CID Crime hnuaia Special Narcotics Police Station team chuan April 4, Thawhṭanni zan khan Vaivakawn Zohnuaiah methamphetamine mûm 1,00,000 (kg. 9.602) an man a, a neitua puh Tuanremi (46), Farkawn, Champhai district, Bawngkawn Hmarvenga cheng mek nia insawi an man bawk. Meth an man hi international market-ah cheng nuai 3,000 mana chhût a ni.

Thanksgiving Day
Mamit District Institute of Education and Training (DIET) chuan nimin khan Thanksgiving Day an hmang a, bawrhsap Lalnunhlua'n a hmanpui. Mamit DIET-ah hian faculty member 13, non-teaching staff 13 leh zirlai naupang 92 an awm mek a ni.

Kawng khar dawn
Vaivakawn traffic point leh Vaivakawn Hunthar Veng péng inkara SIPMIU-in tui pipe lian an phûm chu April 7, naktuk aṭangin chhun leh zanah hna thawh a ni dawn a, hei vang hian hna thawh chhungin kawngpui khâr a nih dawn thu Traffic SP Rodingliana Chawngthu chuan a tarlang.

Khawl hawng
Minister Dr R Lalthangliana chuan nimin khan a bial chhunga Hnahthial Electric Veng community hall-ah Hnahthial district-a sikul 31-a dah tur sanitary napkin vending machine leh incinerator kháwl a sem. Sanitary napkin vending machine hi pawisa thîr hmang a ni a, Re 1 thîr hmangin sanitary pad pakhat lak chhuah theih a ni.