Hripui vei hmuh tam lama 2-na Mizoram

April 4, Thawhṭanni khan Mizoramah Covid-19 vei mi 175 hmuh chhuah a ni a, Kerala dawta hripui vei hmuh tam berna state a ni. Nimin khan hripui vei dam tawh mi 188 chhuahtir an ni a, Covid-19 vei thi an awm lo.

Covid-19 vei hmuh thar mi 175-te chu mipa 71 leh hmeichhia 104 an ni a; RT-PCR hmanga hmuh pahnih, RAT hmanga hmuh 170 leh FIA hmanga hmuh pathum niin, positivity rate chu 16.40% a ni.

Hripui vei hmuh chhuah tharna district pariat awmin, district pathumah hmuh chhuah a ni lo a; swab sample endik tamna ber Aizawl district aia positive hmuh tamna district panga a awm. Positive hmuh thar 175 zinga 33 (18.86%) chu Lunglei district-a Haulawng khuaa mite an ni.

IDSP record angin, Mizoramah Covid-19 vei 2,24,963 hmuh chhuah a ni tawh a, mipa 1,04,845 leh hmeichhia 1,20,118 an ni a, mipa aiin hmeichhia 15,273-in an tam zawk. Nimin tlai dar 5 thleng khan mi 2,23,513 (99.36%) chhuahtir an ni tawh a, mi 687 (0.31%) thi tawhin, enkawl mek mi 763 (0.33%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,24,963 chu mi 1,000 zelah hripui vei mi 205 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.

India ramah April 4 khan Covid-19 vei mi 913 hmuh chhuah niin, Kerala-ah mi 310, Mizoramah mi 175 leh Maharashtra-ah mi 117 hmuh a ni a, state dang zawngah 100 aia tlem vek hmuh a ni. Hmarchhak state zingah Assam, Arunachal Pradesh, Nagaland, Sikkim leh Tripura-ah positive hmuh chhuah a ni lo a; Manipur-ah mi 14 leh Meghalaya-ah mi pahnih chiah hmuh chhuah a ni bawk.