Buaina kan nei lo mai ni loin kan phûr thar - ZPM Leader

Zoram Peoples' Movement (ZPM) leader Lalduhoma chuan, an party chuan buaina an nei lo mai ni loin, an phûr thar deuh deuh zawk niin a sawi.

Lalduhoma hian nimin khan LT Firm, Beraw Luiah Zemabawka LC member an neih thar lawmna hun an hmannaah thu sawiin, ZPM a dinin party dangte'n thil hrang hrangah an buai an ring hle tih a sawi a, "An rin loh ang takin tunah hian inpumkhatna ṭha tak hnuaiah kan kal mek. Party dangte kan party chungchangah an buai hle a, a chhunga awmte erawh chuan buaina kan nei lo," a ti.

ZPM-ah tu nge thu ber tih velah an buai lo tih sawiin Lal­duh­oma chuan, "Party dang ZPM sorkar hlau ngawih ngawihte an buai mai zawk a ni. Collective leadership hi a takin kan hmang mek," a ti a, buaina an nei lo mai ni loin, an phûr deuh deuh thu a sawi a ni.

ZPM Leader chuan, Congress party-in ṭhat loh theih lohna báwm an zuar mek tih sawiin, "Ṭhat loh theih lohna báwm hi khawvela thil thleng thei lo a nih avangin báwm ruak mai an zuar a ni. Congress unau zawng zawngte ZPM policy min tihhlawh­tlinpui turin thinlung takin ka sáwm che u," a ti.

Lalduhoma chuan, ruling party kal tawh rêng rêng an hnathawh a ṭha lo nia sawiin, "A lú ber aṭanga eiruknain bu a khuar nia a lan avangin thil ṭha lo a thlenin zualkona pawh hre loin mipui kan awm mek a ni," a ti a; ruling party awm tawhte chu kawng dik lo mipui zawhtirtu an ni fo tih a sawi.

ZPM MLA-te hnathawh a ṭha bik nia sawiin ZPM Leader chuan, "A daihzai bik a, hei hian kalphung thar kan zawrh mek chu a taka thleng thei a ni tih a tilang nghal. ZPM village/ local council neihna veng leh khua rêng rêngah hna ṭha taka thawh a ni zel hian min tilawm hle a ni," a ti.