Dinhmun pawm thiam turin ngen

MPC party president Lalhmangaiha Sailo chuan nimin khan thuchah a tichhuak a; Covid-19 chungchanga Mizoram dinhmun chu pawm thiam tura mipui ngenin, "Tu mah indema inen hrang loin ṭang tlang zel ila, lungrual ila, hotute thu âwihin, Pathian bèl tlat ila, he hri lak aṭang hian kan la fihlim ngei ang," a ti.

Lalhmangaiha Sailo chuan, "Lockdown 5.0-ah kan awm mek lai hian, green zone ni ṭhin kha ni khat thil thuah red zone-ah kan lut ta dêr mai a. Kan do Covid-19, natna hrik hi hmuh theih loh, hlauh­awm em em hi inthlahdul miah loa theihtawpa lo do hi kan tih tur awm­chhun a ni," a ti a; sorkar leh hma latute hmalakna ṭawiawm zel tur­in Mizoram mipui a ngen.

Covid-19 donaah hma­hruai hmasa bertu doctor, nurse leh medical staff-te fakawm a tih thu a sawi a;  hripui donaa ṭhahnem­ngai taka thawktute zinga mi nunna chán ta - H Lal­venmawii, Sangau leh Nelson K Beizachhi te chu chhuanawm a tih thu a sawi.