Mizoramah kum 22 chhungin Ruihhlo vangin mi 1,271 an thi

Kum 22 leh thla thum chhungin Mizoramah ruihhlo vangin mi 1,271 an thia chhinchhiah a ni a; ruihhlo vanga thi zinga 87.33% chu mipa an ni.

April 5, Thawhlehnia Central YMA buatsaiha CYMA Committee Room-a ruihhlo do chungchanga inràwnkhawm-naa CYMA general secretary Prof. Lalnun-tluanga tarlan danin, kum 2000 aṭanga kumin April 5 thleng khan Mizoramah ruihhlo vangin mi 1,271 an thi a; chu'ng zinga 1,110 (87.33%) chu mipa niin, mi 161 (12.67%) chu hmeichhia an ni.

Kum 2000 hnu lamah ruihhlo vanga thi an tam ber kum (kum pumhlûm) 2004-ah mi 143 an thi a, hei hi YMA-in ruihhlo a do hma a ni a; ruihhlo vanga thi an tlem ber kum, 2008-ah mi 11 an thi a, hei hi CYMA-in Supply Reduction Service (SRS) leh Flying Squad dina ruihhlo a do lai a ni thung.

Ruihhlo vanga thi zat tarlan hi Excise & Narcotics department record aṭanga an lâk a nih thu CYMA General Secretary chuan a sawi.

Central YMA-in ruihhlo a do laiin November 1, 2011 aṭanga October 15, 2019 inkarah ruihhlo chi hrang hrang Rs 29,33,93,753 hû an man. Ruihhlo mante chu report-a lang chin a ni a, ruihhlo man zat tarlan si, a hlutna zat tarlan loh tam tham tak a awm.

YMA hian kum 2004 aṭangin ruihhlo an do ṭan a, CYMA hnuaiah SRS dinin, Aizawl chu zone pariatah an ṭhen a, SRS hmang hian September 2008 thleng hmalak a ni. SRS tihtawp a nih hnuah kum 2009-2010 chhung Flying Squad dinin ruihhlo do leh a ni a, kum 2011 aṭangja August 2013 thleng Central Anti Drug Squad (CADS) hmangin ruihhlo do leh a ni.

April 15, 2015-ah SRS din thar a ni a, batch 10-na thleng awmin, October 15, 2019-ah tihtawp a ni. Kum 2019 October thlaa SRS tihtawp a nih aṭangin CYMA hnuaiah ruihhlo dotu páwl bik siam a ni tawh lo.

CYMA hnuaia ruihhlo dotu pawlte'n ruihhlo an man zat hlutna tarlan chin Rs 29,33,93,753 zinga Rs 3,08,21,968 chu CADS man niin, SRS man hlut zawng chu Rs 26,06,26,635 a ni a, YMA Central Executive Committee leh CYMA hnuaia Kumpuan Committee-te'n an man Rs 19,45,150 hû a awm bawk.