Deptt. 10 hotute dan anga thil ti turin Information Commission-in a hriattir

Mipuiin awlsam zawka sorkar department-te hmalakna leh hnathawhte an hriat theihna tura danin a phûtte an website-a tarlang lo sorkar department 10 hotute chu nimin khan Mizoram Information Commission (MIC)-ah koh an ni a, danin a phûtte tarlang ngei tura hriattir an ni.

MIC chuan RTI Act, 2005 Section 4 (1)(b)-in a tarlan angin, public authority/department-te chu an hnathawhna chungchang mipuiin awlsam zawka an hriat theihna tur point 17 tarlante an department website-ah ṭheuh dah ngei turin a lo hriattir tawh a; chumi bawhzui nan chuan MIC chuan January 19, 2022 khan order a tichhuak.

Sorkar office hrang hranga Departmental Appellate Authority (DAA) leh State Public Information Officer (SPIO)-te chu RTI Act, 2005 Section 4(1)(b)-in a phût angin suo moto disclosure ti vek tur leh February 28, 2022 aia tlai loah an hmalaknate MIC Secretary hnenah thehlut tura hriattir an ni a, Chief Secretary pawh sorkar department-te'n an zâwm ngei em tih hriatpui tura ngen a ni.

MIC hian hriattirna hi sorkar office 130 chuang hnenah a pe a, office 40 chauhin an hmalakna an thehlut. Report thehlut ve lo zinga department lian zual 10-te chu nimin khan chief information commissioner Lalnunmawia Chuaungo leh information commissioner Zorammawia hmaah an inlan a ni.

MIC-a inlan HOD leh SPIO-te chu RTI Act, 2005 Section 4(1)(b)-in a phût angin, mipuiin zawh kher ngai loa an department hmalakna leh an hnathawh chungchangte an website-ah dah ngei tura hriattir an ni. Harsatna an neih pawhin inthlahrung loa MIC beráwn tur leh an website-ah an dah ngei em tih MIC chuan a endik zui zel dawn tih a hriattir bawk.