Sorkar sikulah hming ziak an pung - Education Minister

School Education minister Lalchhandama Ralte chuan, mipuiin sorkarah rinna an nghat nia sawiin, “Sikul luh ṭan ní-ah sorkar sikul tam takah hming ziak an pung a, hmasawnna lawmawm tak a ni,” a ti.

Lalchhandama Ralte hian a bial, Tuivawl constituency a tlawh kualnaah nimin khan Sakawrdai VC House-ah thu sawiin, “Sorkarah mipuiin rinna an nghat a, sikul luh ṭan ní-ah sorkar sikul tam takah hming ziak an pung. Hmun ṭhenkhatah phei chuan sikula leng lo khawp leh ṭhutthleng leh dawhkân neih sa pawhin a daih loh leh class room zauh belh ngaite an awm hial,” a ti a, enrolment a pung thut chu luhaithlak, lawmawm si a nih thu a sawi.

Hun kal tawhah sorkar sikula lut tur naupang an tlêm avangin sikul khâr eng emaw zat a awm tih sawiin Lalchhandama chuan, “Tun dinhmunah chuan sorkarin zirtirtu indaih lohna phuhrûk nan a theih chin chinah zirtirtu a dah belh a, hei hian naupang tam tak a híp a, sorkar sikul a lûn chho leh mek a ni,” a ti.

School Education Minister chuan, sorkar sikula lut an pun avanga harsatna awmte enpui tur leh a theih anga mamawh ngaihtuahpui a, an bialtu MLA-te nen a ṭul dan azira chinfel dan dap turin khawtlang hruaitute a ngen a; a theih ang anga sikul naupangte len theih dan tur dap turin mipui a sáwm bawk.