Aizawlah Craft Bazaar buatsaih a ni

Ministry of Textile hnuaia Development Commissioner (Handicraft) bultumin Mizoram Handloom & Handicraft Development Corporation Ltd (ZOHANDCO) chuan nimin khan Vanapa Hall-ah thiamhnáng hmanga thil siam zawrhna, Craft Bazaar an buatsaih a, minister of state Lalruatkima’n a hawng.

Lalruatkima chuan, Mizo hnam incheina leh pi leh pute aṭanga themthiamna thilte chu hnam dang laka Mizo nihna tichiangtu a nih thu sawiin, “Thil hlu tak leh vawn nun reng chi a ni a, chutiang kawngah chuan ZOHANDCO-in mawhphurhna a neih avangin corporation ṭhiah tâk zingah an tel lo a ni,” a ti a; Mizo la deh aṭanga tah chhuahte mawina, tlona leh ṭhatna lamah hmasawn a la ngaih thu a sawi.

SEDP-in mi themthiamte tan nasa takin awmzia a nei dawn tih sawiin Lalruatkima chuan, “SEDP-ah hian beneficiary-te thawh duh leh thawh thiam ngaih pawimawh a ni a, hei vang hian SEDP hnuaiah Mizo handloom & handicraft huanga hma latute tan hun ṭha a inher chhuak dawn,” a ti.

Craft Bazaar hian April 8, 2022 thleng a awh dawn a, Mizo kutchhuak thil chi hrang hrang zawrh a ni.