MKHC-in smuggling an vei; duhamna laka invéng turin ram hruaitute leh mipui ngen

Mizoram Kohhran Hruaitute Committee (MKHC) chuan thuchhuah siamin, smuggling ti lo tur leh duhâmna ṭha lo lakah invéng fimkhur turin ram hruaitute leh mipui an ngen.

MKHC thuchhuah chuan, kut tling loa sum lâk luh leh duhâmna laka fimkhur tura mi tin ngenin, “Dan loa ram páwn aṭanga bungraw lâk luh (smuggling) te, hmasawnna ruhrel thawhna leh kawng danga dik lo taka sum siamte hi tu mahin ti lo turin kan ngen a ni,” a ti.

India ram chu inthlang ram a nih thu tarlangin MKHC chuan, lalna leh thuneihna duh luat vang te, mimal leh páwl hamṭhatna ûm vanga insùmkàrna nei lék loa hmalakna te, invauna leh inrîkrâpna ang chite ti lo turin mi tinte an ngen.

Ramngaw a chereu zel avangin nasa takin tuihna a tlem tawh tih sawiin MKHC chuan, “Kan ram hi thlalêrah a chang mai ang tih a hlauhthawnawm ta. Kan rama tuihna siamtu thing leh maute tichereu lo a, lui dung ram ngawte hi mimal leh páwl ang pawha hlâwkna ûm avanga tihchereu a nih loh nan leh ṭha taka humhalh a nih reng theih nan theihtawpa hma la zel turin thuneitute leh mipui kan ngen a ni,” an ti.

MKHC chuan, Mizorama Covid-19 hripui léng a ziaawm ta chu Pathian khawngaihna a nih avangin Pathian hnena lawmthu sawi tura mipui an chah rualin, Covid-19 donaa thawhhona ṭha tak a awm chu lawmawm an tih thu an sawi a, “MKHC ngenna ngai pawimawha khaw tina kohhrante ṭan tlànna leh Covid-19 donaa hma latute an thawhpuina zawng zawngah MKHC chuan lawmthu a sawi a ni,” an ti a; hripui léng a ziaawm zel theih nan te, kohhran nun leh rawngbawlnate ṭha taka a ṭhan zel theih nante ṭawngṭai zel turin mipui an ngen bawk.