Vairengte-Chhimluang re-survey zo tawh ; Zangnadawmna vbc. 50 velin a tlahniam

7th April, 2022

Ministry of Road Transport & Highways (MoRTH) hmalaknaa NH-06 leh NH-306 (Vairengte leh Sairang inkar) kawngpui zauh turah kawng enkawltu NHIDCL chuan thlai tihchhiat ngai tur enfiah nawn (re-survey) hna an thawk zo tawh a, zangnadawmna pek ngai a hma aiin cheng vbc. 50-in a tlahniam.

Vairengte-Sairang inkar kawng zauh tur hi hlawm lí-ah ṭhen a ni a, zangnadawmna chungchang buaipui tura Mizoram sorkarin a ruat, Competent Authority for Land Acquisition (CALA), Kolasib Additional DC chuan phase pakhat Vairengte-Chhimluang inkar bika zangnadawmna ngai tur zat chu a tifel tawh a, zangnadawmna ngai zat tura a thehluh chu cheng vbc. 220 vel a ni.

CALA-in zangnadawmna ngai tur zata a tih chu NHIDCL chuan tam lutukah an ngaih avangin thlai lâk tur bikah survey tih nawn a ni. Vairengte-Chhimluang inkar bika NHIDCL-in zangnadawmna atana an ruahman lâwk chu cheng vbc. 150 vel a ni.

Re-survey hi NHIDCL chuan an zo tawh a, MoRTH pawmpui turin an thawn tawh. Re-survey an neihah hian CALA-in zangnadawmna tura a chhût aiin cheng vbc. 50 velin zangnadawmna tur chu a chhut tlem zawk.

NH-306 Land Owners’ Association hruaitute hnen aṭanga Vanglaini thu dawn danin, re-survey-ah hian thlai tihchhiat tur chu a hma aiin tlem deuh mah se, a tlemna a tam lutuk lo.

Zangnadawmna ngai zat tur a tlem chhan lian ber chu, ram lak tur tihfel hnua kudam sak 30 vel, a hmaa zangnadawmna pek tura chhût tel chu enfiah nawnnaah hian an chhût tel tawh loh vang leh, Vairengte police checkgate thlanga chhungkaw 17 huan lâk tur chu Vairengte-Chhimluang ni lo phase dangah telh a nih vang a ni.

Zawhna chhangin NH-306 Land Owners’ Association hruaitute chuan, zangnadawmna tur siam tharah hian an lungawi thu an sawi rualin, “Tuna chhût tel loh, nakina la claim leh tur a awm dawn,” an ti.

NH-06 leh NH-306 zauh tur hi package sarihah ṭhen a ni a, package 1 leh 2 chu Assam lam chan niin, package-2 huam chhungah hian Vairengte khaw chhung a tel. Package-6 huam chhunga ram lak turah zangnadawmna tihfel thawkhat a ni tawh a, package-7 erawh chu kawng kalna tur tihfel a la nih loh avangin chhût a la ni lo.