Cong hunlaia MYC-a sum hman danah ZPM ṭhalaite Lokayukta-ah an zualko

ZPM Ṭhalai chuan kum 2017-2018 inkar khan Mizoram Youth Commission (MYC) hnuaiah cheng nuai 113.92 tihchingpen a awm nia an hriat avangin nimin khan Mizoram Lokayukta-ah complaint an thehlut.

ZPM Ṭhalaite chuan, CAG Report no. 2 of 2021-a a lan danin, Congress sorkar laiin MYC hnenah ‘Capacity Building and Technical Assistance Scheme atan Ministry of DoNER-in March 2017 khan cheng vbc. 1.32 a pe chhuak a, sum chu nasa taka hman sual a nih thu CAG report-ah a lang tih an tarlang.

ZPM Ṭhalai tarlan danin, MYC chuan Mizoram sorkara department 48 aṭangin group B leh C mi 1,499 hnenah April 2017 leh May 2018 inkarah ni 21 chhung ṭheuh computer class an kal tih ziahna loose attendance sheet chu audit hmaah an phawrh. Audit hian department 48 hnenah verification request an thawn a, department 45-in an chhàn laiin, department pathum PWD, Health & Family Welfare leh Food, Civil Supplies and Consumer Affairs-te’n an chháng lo.

Department 45-in chhanna an pek aṭangin training kal nia tarlan mi 1,499 zinga mi 1,300 chu department-ah an hming a taka hmuh tur awm lo an ni a, mi pasarih chiah a taka department-a an hming hmuh tur an awm. Mi pasarih zinga pahnih chu training tura an hming thlan zingah an tel lo thung.

Report thehlut lo department - PWD, HFW leh FCSCA aṭangin mi 199 an training thu tarlan a ni a; heng velah hian sorkar sum nuai 113.92 dik lo taka hman a ni-ah an ngai a ni.

ZPM Ṭhalai chuan, Congress party chu eptu lam an nih hnuah ṭha ber ni âwm taka inlantirin, ‘Ṭhat loh theih lohna báwm’ hmangin an inzuar tih sawiin, “An ruling laia an sapatâl dan kha Zoram mipui hian kan theihnghilh lo a, Congress sorkar laia mipui sum nuai 113.92 hman khawlohna pawh hian mipuite rilru a tina em em a ni. Opposition-a an awm chauhin an ṭha a, opposition-a an awm hian ṭhat loh theih lohna báwmah kan khung khawm a ni maiah kan ngai,” an ti.