NOC pekah fimkhur turin sorkar hriattir

Sorkar laipuia Ministry of Home Affairs (MHA) chuan, ram dang aṭanga bungraw khuahkhirh (restricted item) la lut tura phalna (import license) diltute hnena no objection certificate pek chhuah kawngah fimkhur turin sorkar hotute a hriattir.

MHA chuan, restricted/negative list-a tel bungrua lâk luh dilna chungchangah ruahmanna/rawtna an dawng fo tih tarlangin, “Rawtna dawnte uluk taka zir chiangin, rawtna tam tak chu rinhlelh kai leh sorkar dan zâwm famkim lo an awm tih a hmu a, single tender method-a kalpui a nih tlangpui avangin inelna leh langtlang a awm thei lo,” a ti a, original equipment manufacturer phalna mumal an nei lo fo tih a tarlang.

Manufacturer inti ṭhenkhat chu an thil lak luh tur atan dealer emaw, manufacturer emaw an ni lo tih hmuh a nih thu te, profit margin nasa takin a sàn (hlâwk lutuk) thu te, India sorkar kalpui mek ‘Make in India’ chu an ngaihthah hulhual thu te, license diltu agency-te’n sorkar/CVC guidelines an zawm tur a nih thute tarlan a ni.

Make in India leh GFR Rule 161(iv) zawm tur a nih thu te, supply order an siam laiin profit margin sang lutuk lo tura fimkhur tur leh CAPF/state/UT zawng zawnga police organisation-te chu a ṭul anga hma la turin a hriattir a; DGFT-ah rawtna/ruahmanna an thehluh rualin supply order, end user certificate, ANF form, OEM detail leh importers exporters certificate thil tel tur a nih thute a tarlang bawk.