AMC-in in sak phalna 3,954 a pe tawh

Aizawl Municipal Corporation (AMC) chuan AMC Building Regulations hnuaiah online-a in sak dilna lut 4,548 aṭangin mi 3,954 hnenah phalna a pe tawh.

AMC town planner Ralthuama Ralte chuan zawhna chhangin, thla riat chhungin AMC huam chhungah online-a in sak dil mi 4,548 an awm thu a sawi a, "Online-a in sak dilna hi June 1, 2019 aṭanga kalpui ṭan a ni a, dilna lut zingah enfiah mek 250 a awm a, 17 chu hnâwl a ni," a ti a; in sak dil zingah hian AMC Building Regulation-in a phût ang document pek kim loh vanga dilna pek lêt 331 a awm a, dilna thi (expire) pahnih a awm bawk.

AMC Town Planner sawi danin, June 1, 2019 aṭangin mipui tana him lo leh vantlang tana hnawksak theia in sak 20 chuang chawlhtir leh sak ṭhattir a awm a, chu'ng zingah chuan mimal in leh biak-in eng emaw zat a tel. AMC huam chhunga in sa tur reng rengin AMC-ah phalna an lak a ngai a, in ṭhiat tur pawhin phalna lak a ngai. In sak tih hian chenna in bakah, garage leh bawng-in ang chite pawh a huam vek a ni.