Champhai DC-in department hotute a kâwm

Champhai district bawrhsap James Lalrinchhana chuan nimin khan DC conference hall-ah sorkar department hrang hrang hotute a kâwm a, an hmalakna leh hmachhawpte a sawipui.

James Lalrinchhana chuan, sorkar department hrang hrang hotute chu an tawnhriat leh remhriatnate district leh a chhunga chengte tihhmasawn nana chhawr ṭangkai thiam turin a chah a, “Tun hmaa district lian tak ni ṭhin Champhai district ṭhen darh a nih tak avangin hneh zawk leh hun tam zawk pe chunga enkawl thei turin ṭan la sauh sauh ang u,” a ti a; DC pisa chu dàwr hreh lo tur leh harsatna leh mamawh an neihte thlenna atan hmang ṭhin turin a ngen.

Champhai Bawrhsap chuan, district chhunga department hrang hrangte chakna, ṭan lak ngaihna leh hmachhawpte zir chiana hmalak tum a nih thu leh, sorkar hnathawkte tan Conduct Rules chhiar nguna zawm a ṭul thu a sawi bawk.

Inkawmhonaah hian Champhai SP Lalrinpuia Varte, additional DC Henry C Lalrawnkima, sorkar department hrang hrang hotu te, Assam Rifles, Customs leh bank hotute an tel a ni.