BJP din champha pualin hun hmang

BJP, Mizoram Pradesh chuan nimin khan an party pisaah BJP din champha vawi 42-na pualin hun an hmang a; president Vanlalhmuaka’n thu sawiin, Mizoramah political party dangte’n mipui nasa taka an bum ṭhin thu a sawi.

Vanlalhmuaka chuan, India ramah mipuiin rorel tura BJP an thlan chhan chu mipui hmaa an intiamna leh an manifesto-te a hmatiama an tih zel vang a nih thu a sawi a, “Mizoramah chuan inthlan hmain party dangte’n mipui hmaa an intiam angin an ti ṭhin lo a, Mizo mipui nasa takin min bum a, politician-te rin lohna leh piansualnaah min hruai lut a, a pawi hle a ni,” a ti.

India ramah BJP an sorkar aṭangin hmasawnna hmuh theihin a thleng nia sawiin Vanlalhmuaka chuan, “Hmasawnna a zuanin a zuang dâwrh dâwrh a, chu hmasawnna chu Mizoramah pawh thil thlir zau deuhte chuan kan hmuin kan hre ṭheuh tawh àwm e,” a ti a; Kristiante tan BJP a hlauhawm anga sawi ṭhin chu dâwt a nih thu a sawi.

Mizoram BJP President chuan, BJP din champha chu April 20, 2022 a ni tih sawiin, “BJP din champha lawmna puala hun hmanna turah hian miretheite tana PM scheme hrang hrangte mipui hnena inhrilhhriatna hun hman tur a ni a, Mizoramah pawh district tinah hman tur a ni,” a ti.