Covid-19 vei enkawl mek zat a tlahniam zel

April 5, Thawhlehni khan Mizoramah Covid-19 vei mi 149 hmuh chhuah a ni a, India ram state zinga hmuh chhuah tam lamah pahnihna a ni leh. Nimin khan hripui vei dam tawh mi 157 chhuahtir an ni a, positive enkawl mek zat a tlahniam zel. Nimin khan Covid-19 vei thi an awm lo.

Covid-19 vei hmuh thar mi 149-te chu mipa 63 leh hmeichhia 86 an ni a; RAT hmanga hmuh vek niin, positivity rate chu 16.40% a ni. Hmanraw dang hmanga swab sample endikah positive hmuh a ni lo.

IDSP record angin, Mizoramah Covid-19 vei 2,25,112 hmuh chhuah a ni tawh a, mipa 1,04,908 leh hmeichhia 1,20,204 an ni a, mipa aiin hmeichhia 15,296-in an tam zawk. Nimin tlai dar 5 thleng khan mi 2,23,670 (99.36%) chhuahtir an ni tawh a, mi 687 (0.31%) thi tawhin, enkawl mek mi 755 (0.33%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,25,112 chu mi 1,000 zelah hripui vei mi 205 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.

India ramah April 5 khan Covid-19 vei mi 1,086 hmuh chhuah niin, Kerala-ah mi 354, Mizoramah mi 149 leh Maharashtra-ah mi 136 hmuh a ni a, state leh union territory dang zawngah 100 aia tlem vek hmuh a ni.

State pali - Assam, Nagaland, Sikkim leh Jharkhand bakah, UT pali - Puducherry, Ladakh, Dadra and Nagar Haveli and Daman and Diu, Lakshadweep leh Andaman and Nicobar Islands-ahte positive hmuh a ni lo a; hmarchhak state dang - Manipur-ah mi paruk, Meghalaya-ah mi pali, Sikkim-ah pahnih leh Arunachal Pradesh leh Tripura-ah mi pakhat ve ve hmuh chhuah a ni.