KHAWTHLIR

MADC inthlan hriattirna chhuah
Mara Autonomous District Council (MADC)-a MDC inthlanpui May 5, 2022-a neih tura returning officer Lalsangliana, Siaha DC leh election officer ni bawk chuan nimin khan inthlan hriattirna a chhuah. MADC MDC inthlanpuiah hian May 5, 2022 zing dar 7 aṭanga tlai dar 5 inkarah vote thlak a ni dawn a, vote tlate chu May 9, 2022-ah chhiar a ni ang.

Heroin man
Zokhawthar Police Station-a police-te chuan April 5, Thawhlehni zan khan Melbuk khaw bulah Lalruatmawia s/o Lalhualhima, Zokhawthar hnen aṭangin heroin grams 314 an man. Heroin an man hi international market-ah cheng nuai 157 hû a ni.

MLA-in sikul tlawh
Aizawl North-I bialtu MLA Vanlalhlana chuan nimin khan a bial chhunga Durtlang Primary School-V a tlawh a, sikul class room dawhkân leh ṭhutthleng leh choka mamawh hrang hrang Rs 1,00,000 vel man a pe dawn tih a sawi. Durtlang P/S-V hi kuminah English medium-ah leh niin, zirlai 65 an nei mek a; MLA hnenah hian zirtirtute'n an sikul mamawhte an lo thlen a ni.

MST bus tlân dawn
April 18, 2022 aṭangin MST bus-te tlàntir a ni leh dawn. Thawhṭanniah Aizawl-Mimbung; Thawhlehni leh Zirtawpniah Aizawl-Saipum; Thawhlehni leh Ninganiah Aizawl-Rajiv Nagar-ahte MST bus a tlan dawn a, zing dar 6-ah an chhuak ṭhin dawn a ni.

Hmalakna tur sawiho
Siaha District Development Committee on Backward Community chu nimin khan bawrhsap Lalsangliana kaihhruaiin an ṭhu a; Ministry of DoNER hnuaia North Eastern Council aṭanga Tipa RD block tihhmasawnna tur Rs 4,91,68,987.53 hmanga AH&Vety, Agriculture leh Health department hnuaia hmalak dan tur an sawiho. MADC inthlanpui zawhah thutlukna siam ni se, an ti.