Khung hran: Lunglei district-ah mi 769 Lawngtlai district-ah mi 667 Mamit district-ah mi 390

Nimin chhun dar 12 thleng khan Lung­lei district-a sorkar quarantine faci­lity, community quarantine facility (CQF) leh home quarantine-ah state páwn aṭanga haw khung hran mek mi 769 an awm.

Sorkar thuchhuah tarlan danin, Lunglei district-a khung hran mek mi 769-te zinga 470 chu sorkar quarantine facility, dedica­ted covid health centre (DCHC) leh covid care centre (CCC)-a awmte an ni a; CQF-ah mi 208 awmin, mahni ina inkhung hrang (home quarantine) mi 91 an awm bawk.

Tun dinhmunah Lunglei district-ah Covid-19 hripui vei mi 46 an awm mek a, an zinga pahnih chu DCHC (SIRD, Pukpui)-ah an awm a, mi dang 44 chu CCC (Lunglei College)-ah an awm thung.

Lawngtlai district-ah chuan June 18, Ningani tlai dar 6 thleng khan inkhung hranna hmun hrang hrangah mi 667 an awm a; Covid-19 hripui vei mek mi pariat awmin, Lawngtlaia CCC-ah enkawl an ni a, ngaihtuahawm an ni lo.

Sorkar thuchhuah tarlan danin, Lawngtlai district-a sorkar quarantine facility hrang hrangah mi 529 an awm mek a, community quarantine facility-ah mi 96 awmin, mahni ina inkhung hrang mek mi 42 an awm a ni.

Lawngtlai aṭang hian June 18 khan Zoram Medical College (ZMC) laboratory-a endik turin swab sample 49 thawn a ni a; chu'ngte nen chuan Lawngtlai aṭanga sample thawn tawh zawng zawng chu 741 niin, result hriat tawh 594 leh result nghah lai 147 a awm.

Mamit district-ah chuan nimin thleng khan hmun hrang hrangah khung hran mek mi 390 an awm. Nimin bikah mi 13 khung hran belh an awm laiin, mi 28 an chhuak thung. Mamit district-a khung hran mekte hi quarantine faci­lity hrang hranga awm mi 381 leh home quarantine-a awm mi pakua an ni.