Champhai DC leh MJA inkâwm

Champhai district bawrhsap thar Maria CT Zuali chuan nimin khan a pisaah MJA, Champhai district member-te léngah sáwmin thingpui a inpui a; district hmasawnna tura hmalakna leh hmachhawpte a sawipui.

Maria CT Zuali chuan, Champhai district chu district nuam leh mawi, sik leh sa nuam, Mizona thinlung púa vawng him tlattute awmna nia a hriat thu a sawi a, "Hmun kilkhâwr bera chengte thleng pha tura sorkar scheme leh hnathawhte a zau thei ang bera puanzar a pawimawh. Scheme leh programme thar kalpui tur reng rengah mipui rilru siam hmasak a ṭul ṭhin a, chumi tur chuan media-te an pawimawh hle a ni," a ti.

Bawrhsap chuan, Champhaia thuthar thehdarhtute chu an district hmasawnna leh kal zelna turah thawhpuiah sáwmin, thurawn pea finchhuah ṭhin tur leh, rawtna leh harsatna an neihte a hnena thlen zel turin a sáwm a ni.

Champhai MJA president Lalhming­mawia Pachuau chuan, Champhai DC tharah mipuiin beiseina sang tak an neih thu sawiin, a awm chhungin an district tana hriatreng tlak hnutchhiah tum turin a chah a; district tihhmasawn leh changtlung kawngah an ṭawiawm zel tur thu a sawi.