Aizawl khawpuiah rûkrûk a hluar ; Thil rûk leitute hrem theih an ni - Aizawl SP

Superinrtendet of Police, Aizawl C Lalruaia chuan nimin khan SP conference hall-ah thuthar thehdarhtute a kâwm a, tun hnaiah Aizawl khawpuiah rûkrûk a hluar thu sawiin, "Thil rûk lei chhâwngtute chu dan angin hrem theih an ni," a ti.

C Lalruaia chuan, Aizawla rûkrûk a hluar chhan leh a vên dan ngaihtuahin Aizawl SP hnuaia officer-te leh khawpui chhung police station-a officer-in-charge (OC)-te an ṭhutkhawm thu sawiin, "Uluk taka zir chiangin, mipui hnenah inzirtirna pek a ṭul hle niin ka hria," a ti a; kumin January 1 aṭanga March 31, 2022 chhungin Aizawla police station palia thubuai 572 ziah luh zinga 397 (69.64%) chu rûkrûk case a nih thu a sawi.

Aizawl SP chuan, an zirchianna aṭangin thil bote chu awlsam taka hralh chhâwn theih a nih hlawm thu sawiin, "Hralh chhâwn leh awlsam a nih avanga rûkbo nasat a nih a rinawm. Thil rûk sa leitu lakah a rutute ang thoin dan anga hmalak kan uar lehzual dawn tih mipui kan hriattir a ni," a ti.

Mobile phone bikah original box nei lo, screen lock/password pawh hre lo, charger leh accessory dang pawh nei chuang lote pawh lei duh an awm zel thu sawiin Lalruaia chuan, "Ti tawh lo turin kan inngen a ni," a ti a; mobile phone rinhlelhawm deuhte chu a lock ṭhiahsak lo tur leh police station-a hriattir zel turin mobile siamna dawr neite an chah.

C Lalruaia chuan, thirchhia anga hralh mai theih - PHE pipe, lirthei battery, fire hydrant coupling, copper wire, tui meter, mobile phone tower nut/bolt leh part dangte pawh a bo nasat thu sawiin, "Thirchhe dawr neitute pawh hetiang thil hi lei lo tur leh zuar an awm a nih chuan an awmna bialtu police station hnena report zel turin kan chah a ni," a ti.

Aizawl SP chuan, lirthei, a bik takin two wheeler bo a tam thu sawiin, "Steering lock phelh hnuah an direct a, an hman emaw hralh leh dawnin ignition system thar emaw, modify emaw an mamawh ngei ngei," a ti a; chuvang chuan automobile spare part dawr leh workshop neitute chu ignition system an hralh dawn emaw, an siam dawn emawin, document felfai an neih leh neih loh chian hmasa turin a chah.

C Lalruaia chuan, thil rinhlelh­awm tih hriat ngawih ngawih, a man pangngai nena inthlau lutuk te, a zuartu hmel en reng renga rinhlelhawm, a ken tel tur document nei mumal lo leitute chu IPC Section 411-in a sawi anga man tel zel an ni tawh thu sawiin, "A hremna hi kum thum thleng tàn emaw, pawisa chawi theih, bail theih loh a ni," a ti.

Aizawla police station hrang hrang bakah Emergency Response Support System (ERSS) 112 chu eng lai pawhin biak theih a ni tih sawiin Aizawl SP chuan, "Harsatna leh information pawimawhah a biak theih reng," a ti a; duhthusamin police tam tâwk lo mah se, mipui nen lungrual taka an thawh chuan crime rate a tlâkhniam ngei an beisei thu a sawi.

Aizawl SP-in zawhna a chhàn danin, rûkrûk kaihhnawiha an mante chu ruihhlo nena inkaih­hnawih an ni deuh zel a ni.