Tuichawng lei chimah mi pakhat a thi
Lawngtlai aṭanga Parva panna kawnga Vaseikai leh Lawngpuighat inkara Tuichawng luia lei dawh lai chu April 6, Nilaini tlai dar 5:30 vel khan a chim a, mi pakhat thiin, mi dang panga an hliam.
Lawngtlai aṭanga thu dawn danin, lei chim lai hian hna thawktu mi paruk an awm a, pali chu lui lamah tla thlain, pahnih erawh chu an inham táng hman. Mi parukte chu an hliam a, Vaseikai damdawi-in (PHC)-ah hruai an ni. Mi pahnih chu first aid pek hnuah an camp-ah hawtir an ni a, mi dang pali chu Lawngtlai damdawi-in panpui an ni.
Hliam zinga mi Hasar Ali (25) s/o Achar Uddin, Assam chu a hliam tuar loin Lawngtlai panpui a nih laiin kawng lakah a thi a; mi dang pathum chu Lairam Christian Medical Centre & Hospital, Lawngtlaiah enkawl mek an ni.
Tuichawng luia lei dawh hi Lawngtlai aṭanga km. 125 vela hlá a ni a, lei hman lai chu a hlui deuh tawh avangin a bulah kumin January thla aṭang khan lei thar dawh niin, a chim lai hian a ruhrel chiah an la dawh hman a ni.
Tuichawng lei chu Vaseikai lamah a dotu ban pakhat a awm a, Longpuighat lamah pahnih a awm bawk a; Longpuighat lama lei dotu pakhat zawk chu a chhia a, chu chuan a chunga a za kham phei chu titliakin, lei chu a bung ta a ni.
Tuichawng lei dawh mek chim ta hi ft. 100 vela sei, ft. 40 vela sang a ni a; lei dawhtu chu VIJ Engineering company niin, an manager Tarun Kumar Sinha chu lei a chim hnuah a tlânbo tih Vaseikai police hotute chuan an sawi.