World Health Day hman a ni

Nimin April 7 kha World Health Day a ni a, he ni pual hian Directorate of Health Services-a thawkte chuan director Dr H Lalchungnunga hoin thing an phun.

Kumin World Health Day thupui chu 'Our planet, our health' tih a ni a; sik leh sa inthlâk vanga khawvelin harsatnaa tawh nasat tawh dan leh thing leh mau, ramngaw leh lui, tuihnate a thianghlim theihna tura inzirtirna hun atan kumina World Health Day chu hman a ni.

Dr H Lalchungnunga chuan, khawvel chhe mek zel chhanhim turin mi tinin tih theih an nei tih sawiin, "Kan ramngaw leh luite humhalhin duat nacháng hre thar leh i la, kan chenna khawvel duata venhim nacháng hretu chuan ama hriselna ngei pawh a duat a ni tih hi i hre thar ang u," a ti.

World Health Day hi Assam Rifles pawhin Laki khuaah khawtual mite nen an hmang a, hriselna atana tih tur leh tih loh tur chi hrang hrangte an zirtir.

World Health Day hi World Health Orga­nisation (WHO)-in day a puan 11 zinga pakhat a ni a; kum 1948-a WHO inkhawmpui chuan April 7-ah World Health Day hman a rel a, kum 1950-ah hman ṭan a ni.

WHO-in day a puan dangte chu World Tuber­culosis Day, World Immunization Week, World Malaria Day, World No Tobacco Day, World AIDS Day, World Blood Donor Day, World Chagas Disease Day, World Patient Safety Day, World Antimicrobial Awareness Week leh World Hepatitis Day-te a ni.