Kawngpuia intlansiak khap a ni ; Police-in Aizawla intlansiak an man

Traffic SP Rodingliana Chawngthu chuan nimin khan hriattirna tichhuakin, vantlang hmun leh kawng­puiah lirthei hmanga intlânsiak khap a nih thu a puang. Hetih lai hian, April 6, Nilaini zana Chanmari veng aṭanga bike hmanga intlansiak zinga pahnih chu man a ni tawh.

Traffic SP chuan, kawngpuia veivakte him zawk nan thupek chhuah a nih thu tarlangin, "Aizawl khawpui chhung leh a chhehvela vantlang hmun leh kawngpuiahte lirthei, a bikin two whee­ler intlansiak hriat tur a awm leh ṭhin a, lirthei khalhtu bakah, kawngpui hmangtu mi dangte nunna atan a hlauhawm hle a ni,“ a ti.

Vantlang hmun leh kawngpuia lirthei intlan­siak khapna zâwm lote chu The Motor Vehicles Act, 1988 Section 183, 184 leh 189 hmangin na taka hrem theih a nih thu tarlangin Rodingliana Chawngthu chuan, van­tlang hmun leh kawng­puia intlansiakte lirthei number hriate chu Aizawl Traffic Control Room no. 0389 2322307 leh 9366553559-ah hriattir zel turin a chah.

April 6, Nilaini zan 10 pelh hret khan Chanmari veng aṭangin bike hmang­in mi ṭhenkhat an intlansiak a, police-in report an dawn chuan intlan­siakte chu an ṭîn darh tawh a, police-te chuan an chhui zui nghal a ni.

Police hnen aṭanga thudawn danin, intlansiakna leh a chhehvelah hian mi eng emaw zat an pungkhawm a, a intlansiakate pahnih chu nimin khan man an ni tawh.