Ṭamdil humhalhna tur scheme hawng

Environment, Forests & Climate Change (EFCC) minister TJ Lalnuntluanga chuan nimin khan Ṭamdil chhehvel khuaa chêngte'n ramngaw tichereu zel loa eizawnna ngêlnghet an neih theihna tura chhawmdawlna tur, 'Resource Development and Sustainable Livelihood Improvement under Ṭamdil Wetland' a hawng.

Resource Development and Sustainable Livelihood Improvement scheme hnuaiah hian chhungkaw 206 hnenah Rs 50,000 ṭheuh pek tur a ni.

TJ Lalnuntluanga chuan, Ṭamdil leh a chhehvel khaw mite'n Ṭamdil an vênna leh humhalhna chu lawmawm a tih thu sawiin, "Humhalh chhunzawm zel ula, neitu chan changin theihtawp chhuah ang che u," a ti a; Ṭamdil chhehvela khaw palite'n Ṭamdil bula awm an nih avanga hamṭhatna an dawng thei tur chu a lawmpui thu a sawi.

Minister chuan, EFCC department-in kum nga chhung Ṭamdil enkawl dan tur Integrated Management Plan, cheng nuai 980.81 hû a siam a, sorkar laipuiin a pawm hnuah a kum khatna 2020-21 khan cheng nuai 202.95 a rawn pe tih a sawi a, "Chief minister Pu Zoramthanga’n sum kan dawn theihna turin state sorkar aṭanga do lêtna cheng nuai 22.55 min ruahmansak a ni," a ti.

Resource Development and Sustainable Livelihood Improve-ment hnuaiah hian chhungkaw 206 hnenah Rs 50,000 ṭheuh, a vaiin cheng nuai 103 sem chhuah a ni a; scheme hnuaiah hian Ṭamdil chhehvel khuaa chhungkaw hrang hrang hamṭhatna pea hmalak zel tur a ni.