ZPM chuan kut hnathawktute hi kan ngai pawimawh ber - Duhoma

ZPM leader Lalduhoma chuan, party dangte'n ZPM chu an buai anga an sawina zawng zawngah buaina pakhatmah an nei lo tih sawiin, an party anga inlungrual leh ṭangrual an awm a rin loh thu a sawi a; ZPM chuan kut hnathawktute an ngaih pawimawh ber thu a sawi bawk.

Lalduhoma hian April 6, Nilaini zan khan Ngopa Zawlbûka vantlang inkhawmah thu sawiin, tunlaiin ZPM-in beihna kan tâwk nasa a, amah mimal pawh an beih nasat thu a sawi a, "ZPM hi a lo din khan páwl paruk inchhûng khawm kan ni a, mite'n an inlungrual thei lo ang, symbol-ah an buai ang, flag-ah an buai ang, party hmingah an buai ang, president-ah an buai ang, chief minister-ah an buai ang, min ti a. Pakhatah mah kan buai lo a, kan party anga inlungrual leh ṭangrual an awm lo," a ti.

MNF kaihhruai sorkarah uchuak taka induhsakna a hluar hle tih sawiin Lalduhoma chuan, "Restricted tender mai ni loin, work order pawh awm miah loa hna thawhte pawh a awm. Hei hian a nghawng chu hna thawh ṭhat loh leh a huna zawh loh a ni," a ti a; revised estimate siamin sorkar sumin nasa takin a tuar a, chu chu mipuiin nasa taka an tawrh thu a sawi.

Lalduhoma chuan, ZPM an sorkar chuan contract hna a huna zawh loh a awm dawn lo tih sawiin, "Hna thawk ṭha lo leh a huna zo lo chu kan hrem nghal zel dawn. Hmasawnna hnathawhte endik turin Monitoring Council kan din ang a, anni hian hna rêng rêng a ṭhat leh ṭhat loh an en dawn a ni," a ti.

ZPM Leader chuan, Mizorama sorkar awm tawhah kut hnathawktute an beidawn thu sawiin, "Kan sorkar hrawn mek leh hrawn tawhte'n kut hnathawktute min tibeidawng fo a, ZPM chuan kut hnathawktute hi kan ngai pawimawh ber a, kut hnathawktute'n lei rem kan rah ve phawt dan tur kan ngaihtuah dawn a, sawhthing pawh kg-ah Rs 50-in kan lei dawn a ni," a ti a; sorkar ding tawhte hnuaiah chuan thawk tam leh thar chhuak tam apiangte'n dah ṭawih tur an ngah ṭhin thu a sawi.

ZPM thuchhuah chuan, Lalduhoma hian ZPM zawm thar mi 418-te an party-ah a lawm lut niin a tarlang.