Vaimim chi sem hi kut hnathawktute hmuhsitna a ni - Congress Treasurer

Congress Legislature Party (CLP) leader Zodintluanga Ralte, MPCC treasurer ni bawk chuan, MNF hruai sorkarin SEDP hnuaiah cheng nuai thum pek an tiam laia vaimim chi an pe chu kut hnathawktute hmuhsitna a nih thu leh vaimim chi sem chu kut hnathawktute harsatna thlentu mai a nih tur thu a sawi.

Zodintluanga Ralte chuan nimin khan a biala Bunghmun khuaah thu sawiin, "MNF party hian mipui hmangaihna a nei lo. Tuna SEDP vaimim chi an pek hi kut hnathawktute hmuhsitna a ni a, hetiang hi chhuanmang rorel a ni ber mai. Lo in hâl vek tawhah vaimim chi bag khat tuh zawhna a awm lo ang. Kar leh lawkah bekang chi a lo thleng leh ang a, engtin nge in tih ang. Vaimim chi dawngtute zingah lo nei miah lote pawh an awm a ni," a ti.

MNF sorkarah mipui khai chhuahna tur a awm lo nia sawiin Zodintluanga chuan, "SEDP board-ah mi thiam rual an nei a, chengkawl khawite an rawt a, eng chin nge kan ta ni ang tiin in buai in buai dawn. Mipui hmangaihna leh khaichhuah tumna a awm lo," a ti a; MNF sorkarin Mizoram sum dinhmun an tichhe vek tawh a, contractor leh supplier-te sum cheng vaibelchhe za tél a táng mek tih a sawi.

CLP Leader chuan, Congress party chu ram tana thil ṭhaa inpuahchah mek nia sawiin, "Hetiang sorkar siam tur hian Congress party a inpuahchah a, mi dik 'Mr Clean' an tih Pu Lalsawta kan zuar a, kan ram leh finance siamṭha leh turin kan nei a ni," a ti a; Congress party a thawh lehna tura thâ thawh turin mipui a sáwm a ni.

Zodintluanga Ral-te hian nimin khan Bunghmunah Thianbuka Higher Secondary School a hawng a, Thianbuka HSS hawn tâk lawm nan Rs 5,00,000 a thawh. Bial a fan meknaah Marpara South, Terabonia, New Sachan, Mauzam, Old Sachan, Sumasumi leh Tuikawite a tlawh a, Congress party-ah mi eng emaw zat a lawm lut tih MPCC thuchhuah chuan a tarlang.