Sorkar sikula zirlai an pun chhan Minister sawi MPCC-in pawm lo

Mizoram Pradesh Congress Committee (MPCC) chuan thuchhuah siamin, sorkar sikul ṭhenkhata zirlai an pung chu lawmawm an tih thu an sawi rualin, School Education minister Lalchhandama Ralte-in sorkar sikula zirlai an pung chhan, 'Mipuiin sorkara rinna an nghah vang' a tih chu an pawm loh thu an tarlang.

MPCC chuan, sorkar sikula zirlai an pun chhan nia an ngaih tarlangin, "Covid-19 vanga chhungkaw tam tak economy tlâkhniam vang leh kum hnih chhung zet hri léng vanga sikul kal mumal loh vangah kan ngai," an ti.

Congress party chuan, "MNF sorkar hnu hian a nghet loa zirtirtu eng emaw zat lak belh ni mah se, kalphung siamṭhatna eng mah a awm chuang lo a, sorkar sikulte hi an ṭha thut chuang lo," an ti a; Covid-19 vangin chhungkaw tam takin ei leh barah harsatna an tâwk nasa a, sum lak luh a tlahniam nasa a, fee tam tak cháwia private school-a kaltir tlin lo an tam thu an sawi.

Covid-19 léng chu a la reh loh avangin sikul khàr ngai dinhmunah la din leh theih a nih avangin chhungkaw tam takin sikul kal si loa fee cháwi reng ai chuan sorkar sikulah an fate an luhtir zawk nia sawiin Education minister chu dik lo taka hmingṭhat lâk tumah an puh.

MPCC chuan, MNF sorkarin NABARD sum hmanga sikul sak ṭhatna tur sum tam tak tichingpen tih an sawi a, SEDP hnuaiah advertisement chhuah loin an duhsak zawng mi za tam tak zirtirtu atan lak an nih thu leh, hmun ṭhenkhatah chuan MNF group secretary hmingin zirtirtu lakna tur advertisment an tihchhuah hial thu an sawi.

Congress chuan, data hmuh tur awm lo mah se, sorkar sikula zirlai an pung anga sawi chu thil lawmawm takah an ngai tih an sawi a, "Covid-19 reh hnuaah pawh sorkar sikula lut zat a tlakhniam nghal mai loh nan chak zawk leh awmze nei zawka hma la turin MNF sorkar kan phût a ni," an ti.