MZP-in Assam sorkar chêt dan an dem

MZP chuan thu­chhuah siamin, Mizoram leh Assam ramri buai laiah kut thlak lo tura state pahnihte inremna (status quo) zah loa Assam sorkarin Phainuam Buar­chêpa lei an dawh chu hriatthiam har an tih thu leh an dem tak zet thu an tarlang.

MZP hruaitute chuan April 6, Nilaini khan Phai­nuam Buarchep rama Assam sorkarin lei a dawh leh Bairabi Zophaia Mizoram sorkarin lei dawh mekte a hmunah an enfiah a ni.

MZP chuan, "Mizo­ram sorkarin status quo ṭha taka a zawm lai leh Bairabi Zophaia lei dawh mek pawh laklawh taka chawlhsan a nih mek laiin, Assam lamin Buarchepa status quo chhung, Assam police duty-na piah lamah thir lei ṭha tak hun rei lo te chhunga a dawh hi hriatthiam har kan ti hle. Kut thlak lo tura state pahnihte inremna zah loah Assam sorkar kan ngai a, kan dem tak zet," an ti.

MZP chuan, "Assam lamin hmalakna a kalpui fo avangin Bairabi Zophaia Mizoram sorkarin lei a dawh mek, hun rei tak chawlhsan tawh hi chhunzawm ve nghal turin thuneitute kan ngen a ni," an ti a; Mizoramin a ram chin a chàn zel loh nan ramri uluk taka vil tur leh Assam chêt dan uluk taka thlithlai reng turin thuneitute an ngen.

MZP hruaitute chuan ramri humhalh leh Assam hmalakna chungchangah hian nimin khan chief minister Zoramthanga chu a pisaah an hmu a ni.