Kolasib dist-a hmalakna tur sawiho

Kolasib bawrhsap John LT Sanga chuan nimin khan sorkar department hrang hrang hotute DC conference hall-ah a kâwm a, Covid-19 léng dona kawnga hmalakna, kângmei ven kawnga hnathawh dan, KṬP General Conference thleng tura inbuatsaihna leh department hrang hrang hnathawh dan an sawiho.

John LT Sanga chuan, bawrhsap mawhphurna chelh chu phûrawm a tih thu a sawi rualin, Kolasib district chu Mizoram luhkapui, state ṭhenawmte nena ramri thui tak inṭâwm a nih avangin district chhunga sorkar department hrang hrang hotute nen pheikhai rual taka an thawhho a ṭul thu a sawi.

Sorkar hnathawkte chu mipui tana rawngbawl tura rawih an nihna hre thar leh tura chahin John LT Sanga chuan, "Mahni hna ṭheuhah chian a, mahni mawhphurna ṭheuh hlen hi dah pawimawh hmasa fo ang u," a ti.