Ni 4 chhung hripui vei thi an awm tawh lo ; SRH-ah hripui vei enkawl mi 7 chiah an awm

April 6, Nilaini khan Mizoramah Covid-19 vei mi 101 hmuh chhuah a ni. Nimin khan hripui vei dam tawh mi 143 chhuahtir an ni a, Covid-19 vei thi an awm lo a, a záwnin ni li chhung hripui vanga thi an awm tawh lo.

Covid-19 vei hmuh tharte chu TrueNAT hmanga hmuh pakhat, RAT hmanga hmuh 98 leh FIA hmanga hmuh pahnih an ni a, positivity rate chu 13.69% a ni. Mi 101-te chu mipa 52 leh hmeichhia 49 an ni a, hun rei tak hnua hmeichhia aia mipa an tam lehna hmasa ber a ni.

Nimin tlai dar 5 thleng dinhmun angin, April 3 hnuah hripui vanga thi Mizoramah an awm tawh lo a, a záwnin li chhung Covid-19 vei thi an awm tawh lo. Covid-19 positive inenkawl mek zat pawh a tlahniam zel bawk.

State Referral Hospital-ah pawh hripui vei enkawl zat tlahniam zelin, nimin tlai khan mi pasarih chiah an awm a, chu'ng zinga pahnih chu ICU-ah awmin, ventilator hmanga enkawl an ni.

IDSP record angin, Mizoramah Covid-19 vei 2,25,213 hmuh chhuah a ni tawh a, mipa 1,04,960 leh hmeichhia 1,20,253 an ni a, mipa aiin hmeichhia 15,293-in an tam zawk. Nimin tlai dar 5 thleng khan mi 2,23,813 (99.38%) chhuahtir an ni tawh a, mi 687 (0.31%) thi tawhin, enkawl mek mi 713 (0.31%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,25,213 chu mi 1,000 zelah hripui vei mi 205 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.