KHAWTHLIR

Thisen pe
J Thankima College NSS leh Red Ribbon Club chuan nimin khan an college-ah thisen pek an huaihawt a, Aizawl Civil Hospital tan thisen unit 81 an pe a, petute mipa 69 leh hmeichhia 12 an ni.

SIT-in chhui
March 18, 2022 zing dar 9 rîk hma deuha Durtlang khaw chhung, Zuangtui-Selesih kawngpui kama awm workshop pakhata electric detonator (kêp) nia hriat puak vanga mi pathum thihna chungchang chu police-te‘n an chhui zui zel. He thil thleng hi police-te chuan an ngaih thutak avangin a chhui turin special investigation team (SIT) an din a ni.

Infiamna Hunpui
Mizo 1st IR battalion headquarters, Mualvum chuan nimin khan ‘Infiamna Hunpui 2022’ an buatsaih a, Tuirial bialtu MLA K Laldawng­liana‘n a hawng.

Lehkhabu tlangzarh
Upa T Vanlawma lehkhabu ziah, 'KD Run' tih chu nimin khan MLA C Lalmuanpuia'n Aizawl Press Club-ah a tlangzarh. Synod Social Front buatsaih, 'Mizote tan nun kawng dik' tih lehkhabu chu April 5, Nilaini khan JM Lloyd Hall, Synod Office-ah Synod moderator Rev.Dr Vanlalnghaka Ralte-in a tlangzarh bawk.

Darlawnah training
Mizoram State Biodi­versity Board (MSBB) chuan nimin khan Darlawn RD block chhunga khaw ṭhenkhata Biodiversity Management Commi­ttee (BMC)-te pualin Darlawn BRC Hall-ah Training & Capaci­ty Building an buat­saih a, Darlawna VC pathum bakah, Khawruhlian, Khanpui, Lailak, Hmunnghâk, Pehlàwn, New Vervek, N Khawdungsei, N Ṭinghmun, Thingsât leh Vaitin khuaa BMC member-te an tel. MSBB hian RD block pariata BMC member-te tan training an buatsaih chho mek a ni.

SMATEE 2022
Higher & Technical Education chuan, Mizoram State Medical and Technical Entrance Examination, 2022 exam tumte tan www.smatee.com ah exam form fill-up leh exam fee pek theih a nih thu a tarlang. Exam fee hi bank card hmangin a pek theih a ni.