Vawiinah vote chhiar a ni dawn ; Counting hall 40 leh counting table 347 siam

Mizoram chief electoral officer Ashish Kundra chuan nimin khan a pisa building-a media centre-ah thuthar thehdarhtute kâwmin, vawiina Mizoram State Legislative Assembly pariatna inthlanpuia vote chhiar turah engkim peih a nih tawh thu leh, zing dar 8-ah chhiar ṭan a ni ang a, Assembly constituency 40 tan counting hall 40 leh counting table 347 siam a nih thu a sawi.

Ashish Kundra chuan, Mizoram pumah con­sti­tuency 40 atan counting centre 13 siam a nih thu sawiin, "Constituency tinin counting hall hrang ṭheuh an nei dawn a, counting table 347 siam a ni," a ti.

CEO sawi danin, EVM coun­ting table tin chu coun­ting supervisor pakhat, coun­ting assistant pakhat leh micro-observer pakhat6in an enkawl zel dawn a, EVM bik atan counting table 1,041 siam a ni. Postal ballot counting table-te chu coun­ting supervisor pakhat, counting assistant pahnih leh micro-observer pakhat zelin an vil dawn a, postal ballot 40-te chu mi 160-in an chhiar ang.

Counting supervisor pakhat, counting assistant pahnih leh micro-observer-te chu returning officer, assistant returning officer, additional micro-observer leh additional counting assistant-te'n an vil dawn a, hetiang mi hi mi 200 an awm dawn. Vote chhiarnaa official duty tur zawng zawng chu mi 1,401 an ni (hetah hian IVth. grade staff leh security duty-te an tel lo).

CEO chuan, December 8, Inrinni thlenga vote tla an dawn tawh zat chu 6,32,476 a ni tih sawiin, chu chu 81.64% a nih thu a sawi. CEO sawi danin, EVM bikah 8.12.2018 thleng khan vote 6,20,332 a tla a, chu chu 80.52% a ni. Service voter leh ETPBS voter aṭangin postal ballot-ah vote 4,889 a tla a, chu chu 12.06% a ni. EVM leh postal ballot leh ETPBS-a vote tla zawng zawng chu 6,32,476 a ni a, December 8, Inrinni thlenga Mizoram inthlanpuia vote tla chu 81.64% a ni.

Ashish Kundra chuan, vote chhiarnaah venhimna khauh taka kalpui a ni dawn tih sawiin, "Security duty thuah thum a awm dawn. A hmasa berah Mizoram police an duty ang a, a dawtah Mizoram armed police an duty ang a, counting hall hnaih berah central armed police-te an duty ang," a ti a; counting centre aṭanga metre 100-a hnaiah motor tlan luh phal a nih loh thu leh, counting hall-ah mobile phone ken luh phal a nih loh thu a sawi.

CEO sawi danin, Mizoram pumah vote chhiarna hmuna duty turin central armed police force (CAPF) company pariat dah a ni a; Aizawlah company pahnih leh platoon khat, Kolasib, Mamit, Champhai-ah company pakhat ṭheuh, Lunglei, Serchhip, Lawngtlai leh Siaha platoon hnih ṭheuh a ni ang.