Car chesualah mi 4 an thi, 1 a hliam

December 9, Pathianni zing lam khan NE Khawdungsei daiah WagonR car chesualin kawng thlangah metre 300 vel a lum a; mi panga chuang zinga pali an thi a, lirthei khalhtu Lalchhuanawma (44), Khatla East chu na takin a hliam bawk.

Vanglaini thu dawn danin, lirthei chetsual vanga thite chu Bethlehem Veng mi pathum - Neihkimi (70) w/o Lalenga (L), Lalramthara Hmar (61) (car neitu) h/o Thanṭhuami (L) leh Demhnuni (60) w/o Biakchhawna te leh, S Zamawii (50) w/o Thangza-

ṭhuama, Saron Veng, Aizawlte an ni. Car neitu Lalramthara Hmar nupui Thanṭhuami (L), Neihkimi leh S Zamawii te hi unau an ni a, an laizawn fanu thi vui tura kal an ni. Demhnuni chu an nuṭapa Biakchhawna nupui a ni thung.

Car-a chuangte hi inchhung­khat hnaivai tak vek an ni a, Chura­chandpur, Manipur-a an chhungte vuinaa kal tum niin, December 8, Inrinni zan dar 8 velah Aizawl an chhuahsan. Pathianni zinga Khawkâwna an chhungte ina chaw ei tum an ni a, Khawkawn an thlen theih lawk loh avangin Pathianni chawhnu lamah Khawkâwna an chhungte chuan an zawn ṭan a, Pathianni zing dar 7 rîk hma deuhin Ngopa police checkgate an tlan pêl tih an hria a, Ngopa aṭangin Khawkâwn lamah an zawng let nghal a ni. An hmuh mai loh avangin NE Khawdungsei mipuiin an zawnpui a, tlai dar 5 pelh hnuah NE Khawdungsei thlen hma deuhah an chesual tih hmu ta a ni.

A zawngtute'n chetsualna hmun an thlenin Neihkimi, Lalramthara Hmar, Demhnuni leh Zamawii te chu an lo thi tawh a, car khalhtu Lalchhuanawma chu hliamin, NE Khawdungsei damdawi-inah lak nghal a ni a, a nâk ruh a tliak nuala hriat a nih avangin Ngopa damdawi-inah x-ray hmanga en a ni.

Mitthite chu NE Khawdungsei YMA-te'n kuang an siamsak hnuah Aizawl panpui an ni a, nimin zing dar 9 vel khan an chenna inah thlenpui an ni. Bethlehem Veng mi Neihkimi, Lalramthara Hmar leh Demhnuni te chu Bethlehem Presbyterian Kohhran Revival Centenary Hall-ah nimin tlai dar 3 khan a ruala vui an ni a, Zamawii chu chhun dar 1-ah Saron Venga an inah vui a ni thung.

Hliam tuar Lalchhuanawma pawh nimin zing dar 9:30 vel khan Aizawl Civil Hospital thlenpui a ni a, admit nghal a ni.