Kan candidate-te'n vote an hmu ṭeuh dawn - NPP Spokesperson

National Peoples' Party (NPP) thupuangtu leh Meghalaya Home minister James Sangma chuan Mizoram MLA inthlan neih zawh takah an party candidate-te'n vote an hmuh ṭeuh dawn thu a sawi.

James Sangma hian nimin khan Aijal Club-ah thuthar thehdarhtute kawmin, MLA inthlan neih zawh takah consti­tuency pakuaah candidate an neih thu a sawi a, "Mi­zorama NPP kan rawn luh hun hi thla 2 liamta vel awrh chauh a ni a, kan candidate-te phei chuan chawlhkar thum vel bak campaign-na hun an nei mang lo a ni," a ti.

Mizo mipuite'n NPP an ngaihven nia sawiin James Sangma chuan, "Kan candidate-te hian Mizo mipuite khawngaih vote an hmu ṭeuh dawnin kan hria a, kan lawm takzet a ni. Kan candidate vote tu zawng zawngte hnenah lawmthu kan sawi a, in vote hlu tak hian hna ropui tak a thawk ngei ang," a ti a, tun ṭum inthlanah hlawhtling lo mah se, NPP chu Mi­zoramah a kal zel dawn thu a sawi.

NPP Spokesperson chuan nakkuma MP in­thlanah candidate an neih dawn thu sawiin, "Chumi hunah chuan Mizoram mipui zawng zawng te, Mizoram tan chauh ni lo, hmarchhak mipui leh tribal zawng zawngte tana chenfakawm tur candidate rawn vawrh chhuah ngei kan tum dawn a, Mizo mipuite min vote sak turin kan sawm nghal a che u," a ti.

James Sangma sawi danin, NPP thil tum ber chu India ram, a bik takin hmatchhak state-a tribal-te inlungrualtir a ni. Hmarchhak state-te chu mihring pawh tam lohna, state-te reuh te te kan nih vangin kan inthurual loh chuan central India-a political party liante'n engmahmah min ngai lo reng dawn a ni.