KHAWTHLIR

Tlan khap
Lunglei SP chuan thupek chhuahin, November 28, 2018-a Mizoram Assembly inthlana vote tlate vawiinah chhiar a nih dawn avangin, Saikuti Hall kawngah zing dar 5 aṭanga tlai dar 5 thleng lirthei tlan a khap a; vote chhiarna tur Saikuti Hall aṭanga metre 100 bial chhungah lirthei dah a khap bawk. Thupek hian phalna neite leh election duty-te a huam lo ang.

Dawr theih loh
Serchhip DEO Sangchhin Chinzah chuan thuchhuah siamin, MLA inthlana vote tlate vawiin zing dar 7 aṭanga chhiar turah vote chhiarna-a duty tur micro observer atan United Bank of India, Serchhip branch-a thawkte ruat an nih avangin, vawiin hian UBI, Serchhip Branch dawr theih an nih dawn loh thu a tarlang.

Sem rual
MLA General Election 2028 neih zawh taka vote tla chhiar tur counting supervisor, counting assistant leh endiktu tur micro observer-te an duty na tur hmun Assembly constituency ṭheuha sem rualna Second Randomisation of Counting Official chu nimin khan NIC conference hall, Champhaiah buatsaih a ni.

Ṭanpuina hlan
Aizawl Municipal Corporation (AMC) chuan tun hnai khan Bethel Camping Centre, Chawnpui; Gansabra, Luangmual; TNT, Muanna Veng leh Cancer Hospital, Zemabawkah ṭanpuina an hlan.

Puang chhawng zel dawn
Information & Public Relation department chuan thuchhuah siamin, aurinna hmangin an pisa aṭangin district tina vote chhiar a nih dan an puan chhawn zel dawn thu an tarlang a, "He public announcement hi district tina counting hall chhunga media centre tina information lutkhawmte behchhan a siam a ni dawn a ni. Vote chhiar ni hian Returning Officer(RO) ten round khat chhiar zawh apiangin vote chhiar zat leh hemi round a candidate-te vote hmuh zat counting hall chhungah an puangzar ṭhin dawn a, hemi hnuah hian counting hall pawn lama chanchin lo ngaichangtute tan counting hall chhunga media centre incharge IPRO-ten an puang chhawng ve leh bawk dawn a ni," an ti.