Sorkar thei, hniam taka awm thei kan ni - K Sapdanga

Zoram Peoples' Movement (ZPM) leader K Sapdanga chuan nimin khan an pawl pisaah thu a sawi a, ZPM chu hneh taka sorkar thei leh hniam taka awm thei an nih thu sawiin, "ZPM sorkar theihna atana thawktu zawng zawngte hnenah lawmthu kan sawi a ni," a ti.

K Sapdanga chuan, tunlaiin opinion poll hrang hrang tih­chhuah a nih thu sawiin, "A tichhuaktute phai lam chanchinbumite hian Mizoram an lo luhin, an chuanna taxi púte an zawh apiangin ZPM sorkar an rin thu an hrilh ṭhin. Aizawl khawpui chhung an lo luhin MNF party leh Congress party flag intár an hmuh tam vang te, ZPM-in flag kan lo tàr ve chiam si loh vangin hniam takah min dah ṭhin," a ti a; phai lam chanchinbumi, amah kâwmtute chu 'flag hmangin sorkar tur an teh em ni?' tia a zawh ṭhin thu a sawi.

Ṭhalai tam ber leh zirlai­te, neutral tam ber te, sorkar hna­thawk tam berte leh kohhran hrang hrangin sorkar tura an duh ber chu ZPM a nih thu sawiin Sapdanga chuan, "Pachhia leh retheite leh kut hnathawktute zawng zawngin an beisei chu ZPM sorkar a ni. Hetiang a nih mek lai hian ZPM hi hneh takin kan sorkar thei a, hniam takah kan awm thei bawk," a ti.

ZPM Leader chuan, inthlan puan hma leh puan hnuah mahni sum sêngin campaigner hrang hrangin theihtawp an chhuah tih sawiin, "ZPM aṭanga mimal hlâwkna beisei miah lo, ZPM-a tel hranpa miah lo chenin mahni sum leh pai, tha leh zung sêng an awm ṭeuh tih kan hria. Kan star campaigner-te pawh mahni sum leh pai, thâ leh zung sêngin he Zoram siamṭha tur hian theih­tawp tak meuh an chhuah a ni," a ti a; ZPM sorkar theih nana thawktu zawng zawngte hnenah an lawm thu a sawi.

ZPM candidate-te chuan Val Upa Council hriatpuinain Pathian hmaah chhia an chham tih sawiin K Sapdanga chuan, "Khawvel dan hmaa thutiam bawhchhiate chu khawvel danin a hrem mai ṭhin. ZPM candidate-te chu party dang ang loin Pathian hmaa thutiam kan nih avangin kan thutiam bawhchhiat chu taksa leh thlarau thlengin kan chungah Pathian hremna a thleng thei dawn tih i hre reng ang u," a ti.