Thla 3 chhungin TB vei 636 hmu

Nimin khan video conference hmangin National TB Elimination Programme first quarter review meeting neih a ni a; kumin January-March chhungin Mizoramah ngawr (tuberculosis) vei mi 636 hmuh chhuah an ni tih tarlan a ni. TB vei zinga 92.54% chu tihdam an ni tawh.

Review meeting hi state TB officer Dr Zothankhuma Chhakchhuak-in a kaihruai a, District TB Center tina hotute an tel. Report-a a lan danin, January-March, 2020 chhung khan ngawr vei rinhlelh mi 3,469 enfiah an ni a, chu'ng zinga mi 636 chuan TB an vei tih hmuh chhuah a ni. MDR-TB (Drugs resistance TB) vei mi 48 hmuh chhuah a ni bawk.

TB vei hmuh chhuah hi Aizawl district-ah tam berin, mi 466 an ni a; hetih lai hian, nikum chhung khan Mizoram pum­ah TB vei mi 2,927 hmuh chhuah an ni.

TB veite'n thla tin ei tur ṭha an leina tur Nikshay Poshan Yojana (NPY) kal­tlanga Rs. 500 an dawn ṭhin chu May 2020 thleng khan mi 4,187 (88.65%)-in an dawng mek tih tarlan a ni bawk.