Dan loa pollution certificate dil chíng an tam

Mizoram Pollution Control Board (MPCB)-in Supreme Court thupek anga lirthei khû (emission) tehna hmun a din, Vehicle Exhaust Emission Testing Centre (VEETC)-a thawkte chuan, lirthei neitute zingah pollution certificate nei si lo, lirthei chetsual hnua dik lo taka pollution certificate dil leh chíng an tam thu an sawi.

Hetih lai hian, National Green Tribunal thupek angin sorkar chuan December 1, 2018 aṭanga hman ṭan turin bawlhhlawh hâl hrim hrim a khap a, bawlhhlawh hâlte chu pawisa chawitir zel tur ni mah se, he thil bawhzuitu MPCB-a thawkte chuan bawlhhlawh hâl man an la nei lo.

VEETC-a thawkte chuan, "Insurance claim dáwnah pollution certificate a ngai tawh si a, back date dil ni tin deuhthaw an lo kal ṭhin," an ti a; chutih rualin, "Hetianga dan dik loa diltute hi kan pe chhuak ngai lo," an ti bawk.

Motor khu endiknaa thawktute chuan, lirthei neitute zingah dân anga lirthei khu endiktir an tam lo hle nia sawiin, "Public carrier-te hian insurance an tih dáwnah pollution certificate an neih ngei a ngaih avangin an endiktir ṭhin a, mimal lirthei nei zingah endiktir an tlem hle," an ti a; lirthei pun chak dan leh lirthei tam dan ngaihtuaha an hnena lirthei khu endiktir an tlem thu an sawi.

VEETC-a thawkte sawi danin, Aizawlah hmun thum - Zemabawk, Bawngkawn leh New Secretariat-ahte VEETC a awm a, thla khatah lirthei 150-200 vel an endik tlangpui. Chutih laiin, traffic police-te'n document an enfiah dawnah an lûn hle thung a, Krismas dawn hnai, traffic police-te an khauh hun lai, October-November velah chuan thla khatah mi 300-400 velte an endik ṭhin.