Forest reserved ṭhiahna thupek khinna High Court-in a la ngaihtuah thei rih lo

Gauhati High Court (GHC), Aizawl Bench-in January 27, 2021-a Mizorama lui 16 kam, reserved forest ni ṭhin a ṭhiahna thupek Mizoram sorkarin GHC, Aizawl Bench-ah vêk an khin lêtna chu a ngaihtuahtu tur an la awm loh avangin ngaihtuah a la ni lo.

Gauhati High Court-a Mizoram sorkar ukil hnen aṭanga Vanglaini thu dawn danin, thupek khin lêtna ngaihtuah tur hian reserved forest chungchang ngaihtuah hmasak ṭuma tel lo judge pahnih an awm a ngai a; tun dinhmunah Aizawl Bench-ah hian reserved forest ngaihtuah hmasak ṭuma tel lo judge pahnih an awm rih lo a ni.

Reserved forest chungchanga thutlukna ngaihtuah a nih theihna tur hian GHC Aizawl Bench Registrar chuan thuneitute hnenah a ngaihtuah theitu tur judge a dil mek a; thuneitu sang lamin a ngaihtuahtu tur judge an ruat veleh ngaihtuah ṭan a ni ang.

Mizoram Chief Secretary-in August 5, 2016-a order a chhuah leh January 28, 1965-a notification a tihchhuah, The Mizo District (Forest) Act, 1955-a section ṭhenkhat chu mi 681-in Gauhati High Court-ah an khing a ni.

The Mizo District (Forest) Act, 1955 chungchanga sorkar order leh notification chu High Court-in a ṭhiat a, chuvang chuan Tuirial Hydro Electric Power siamna atana ram laknaah mi 681 hnenah zangnadawmna cheng nuai 3,000 chuang Mizoram sorkarin a sèn belh a ngai dawn.

Chief Secretary order leh January 28, 1965-a notification ang chuan, Tuirial HEP siamna atana ram lâk neitu mi 681-te ram chu reserved forest chhunga awm a nih avangin zangnadawmna an dawng thei lo a, mi 681-te chu Gauhati High Court-ah an zualko ta a ni.

High Court chuan thutlukna siamin, mi 681-te chu an chak a, mi 681 hnenah Mizoram sorkarin zangnadawmna a pek a ngai dawn a, mahse, Mizoram sorkar chuan a khing lêt a ni.