ZPM-in Mara mipui a ngai pawimawh - ZPM Working President

ZPM working president K Sapdanga chuan nimin khan Siaha Press Club-ah thuthar thehdarhtute a kâwm a; ZPM-in Mara mipui a ngaih pawimawh thu leh MADC-ah sorkar din ngei an tum thu a sawi rualin, sum hmachhuan an tum loh thu a sawi.

K Sapdanga chuan, MADC inthlan tur puan a nih rual rualin ZPM-in inthlan hmachhawn turin a bawhzui nghal tih sawiin, "Mara ram mipui kan ngai pawimawh hle a, ZPM sorkar din ngei tumin thutlukna kan siam a, hma kan la nghal a ni," a ti.

ZPM chuan kalphung thar, mipui sorkar siam an tum tih sawiin Sapdanga chuan, "Sorkar ṭha, mipui sorkar siam turin kan lo kal a ni. Ram rorelnaah Pathian ram tun din kan tum avangin kan candidate-te pawh vote zawnnaah hmanraw thianghlim lo leh bawlhhlawh hmang lo turin kan hrilh lâwk a, sum hmachhuan kan tum lo," a ti a, mipui dikna leh zahawmna chu sum hmanga tihthangtlawm an tum loh thu a sawi.

Siaha district chu ZPM Headquarters hruaitu 20 velin an ṭhutchilh mek thu sawiin, ZPM chu party thar, unit pawh Siaha district-a la nei tam lo an ni chungin hmasawnna an hmu mek tih a sawi a, "A tirah chuan bial paruk vela kan din chuan lungawi mai turah kan inngai a, mahse, vawiina ZPM hmasawnna ka hmuh hi keimah ngei pawh hian ka awih lo lek lek a ni. Mara mipuite'n ZPM-a beiseina sang tak an nei hi chona nasa tak a ni," a ti.

ZPM Working President chuan, MADC mipuite'n an suangtuah ṭhin hmasawnna chu a taka hmuhtir an chak thu sawiin, "Tunah hian candidate duhawm tak tak chhawp chhuak turin hma kan la mek. Sorkarna siam kan sawi pha ngai lo a, tunah chuan mipui hian sorkar min siamtir thei dawnin kan hre ta a, bial tina candidate nei turin hma kan la mek a ni," a ti a; ZPM thláwp turin Siaha district mipui a sáwm a ni.