College-te hnam làmah an intihsiak

Mizo Zirlai Pawl (MZP) chuan nimin khan Zarkawt Recreation Centre-ah Inter-College Cultural Dance Competition an buatsaih a, Art & Culture minister R Lalzirliana'n a hmanpui. Hnam làm intihsiaknaah hian Champhai College chu pakhatna an ni.

R Lalzirliana chuan, Zo nun ze mawi vawn nun a pawimawh tih sawiin, "Mizo culture vawng hima chawi sang zel turin Zo fate hian mawh kan phur. Mizo hnam nun zia chawi nung a, a chhe laite erawh paihin, zirlaite'n Zo nun ze mawi in vawn nun zel a ṭul," a ti a; zirlaite chu Mizo hnam tana ro hlu, ram tana chhenfâkawm nih tum turin a chah.

Hnam làm intihsiakah hian Aizawla college pathum leh Aizawl páwn lama college pali an tel a; Champhai College chu pakhatna niin, lawmman Rs 30,000 an dawng. Pahnihna T Romana College-in Rs 20,000 leh pathumna Aizawl North College-in Rs 15,000 an dawng a; thuchei leh trophy an dawng ṭheuh bawk.