Vaimím chi ngaih­tuah chiang loa sem a ni - Zodintluanga

Thorang bialtu MLA Zodintluanga Ralte, Congress Legislature Party (CLP) leader ni bawk chuan nimin khan Lungsen Group YMA hnenah ambulance a hlân a; SEDP hnuaia vaimím chi sem chu ngaihtuah chiang lo leh mipui hmangaihna tel loa sem a nih thu sawiin, pawi a tih thu a sawi.

Lungsen YMA Hall-a ambulance hlanna inkhawmah Zodintluanga chuan, SEDP sem thu a hriata a lawm em em laiin, an thlan dan leh pek dan chu pawi a tih thu a sawi a, "Ngaihtuah chiang lo leh mipuite hmangaih loin an sem a, a pawi ka ti hle a ni. Kan bial chhunga kan tawn a nih avangin a pawi ka ti êm a, ka sawi chhuak a ni," a ti.

Zodintluanga Ralte sawi danin, vaimim chi chu khaw pakhatah chuan ip khat ṭheuh chhungkaw pathum hnenah an pe a, vaimim chi an pekte chuan lo an nei lo a, vaimim chi ip khat chìnna tur ram vat an awm lo a, vaimim chi an dawng dawn tih pawh an hre lo a ni.

Lungsen aṭangin Lungleiah damlo phurh a ngai ṭhin tih sawiin Zodin­tluanga chuan, "Vanneih­thlak takin inphurhna tur ambulance air condition kan inpe thei a, Lungsen leh a chhehvel mipuite'n an mamawhna hriaa Lungsen Group YMA-te'n min lo dawn sak thei hi ka lawm em em a ni," a ti a; ambulance chuan group chhunga khaw hrang hrangte a huam vek dawn thu a sawi.

CLP Leader chuan, kum li dáwn an sorkar tawh loh chhungin a bial chhungah mipui leh mimalah sorkar aṭanga ṭanpuina a awm loh thu sawiin, "A mangan thlak em em a, healthcare ang pawhin kan buai em em a ni," a ti.