Kan sorkar chuan MSSSB kan ṭhiat dawn - Lalduhoma

ZPM leader Lalduhoma chuan, an party chuan 'sem policy' tihtawp an duh thu a sawi a; ZPM an sorkar chuan MSSSB chu an ṭhiah nghal tur thu leh minister-te'n an ngaihtuah chawp ngai loin hmalak dan tur road map an neih tawh thu a sawi bawk.

Lalduhoma hian April 7, Ningani khan Lengteng bial chhunga Kàwlbêm, Teikhang, Hriang­hmun leh Mímbung khuate a tlawhnaah thu sawiin, "Party-ah ni loin policy-a rinawm turin kan inzirtir a ngai tawh a, party ruih­chilh­na hian kan ram a tichhe nasa tawh em em a, keini chuan 'sem policy' hi tihtawp kan duh a ni," a ti.

ZPM Leader chuan, "ZPM kan sorkar chuan minister-te'n ngaihtuah chawp ngai loin kan hmalak dan tur road map kan nei thlap tawh a, kalphung ṭha zawk leh system mumal zawk kan siam dawn a ni," a ti a; "Sorkar hna lak chungchangah kan fair dawn a, MSSSB (Mizoram Subordinate Services Selec­tion Board) hi kan ṭhiat nghal dawn," tiin, a ṭha leh tling an lâk mai dawn thu a sawi.

Sorkar kal tawh leh awm mekah thingtlanga kut hnathawktute tan budget-ah sum dah a ni ngai loa sawiin Lalduhoma chuan, "ZPM chuan kut hnathawktute thlai chi kan inchìntir ve a nih pawhin a tàwp kan thlenpui dawn. Kumtluana risk laa hna inthawhtir hi tihtàwp kan duh," a ti.

ZPM consultant F Ro­dingliana pawhin thu sawiin, "ZPM chuan ram tan hmachhawp tam tak kan nei a, kut hnathawktute tan hmachhawp kan nei a, chutiang bawkin sumdawngte tan leh lehkhathiam leh thiam lote tan pawh hmachhawp kan nei a ni," a ti a; ni 100 chhunga tihhlawhtlin tur, kum hnih chhunga tih tur, kum nga chhunga tih turte an duang a, kum sarih chhunga Mizoram intodelhtir an tum thu a sawi.

Lalduhoma hian ZPM party zawm thar voter 591 a lawm lut niin ZPM thu­chhuah chuan a tarlang.